Ақтөбе облысының Төтенше жағдайлар департаменті су айдындарында қауіпсіздік шараларын сақтау қажеттігін еске салады
Биыл Ақтөбе облысында қауіпсіз шомылу маусымын ұйымдастыруға бағытталған ауқымды іс-шаралар жоспары әзірленіп, бекітілді. Құжат су айдындары жанында белсенді демалыс кезінде азаматтардың өмірі мен денсаулығын сақтауға бағытталған шаралар кешенін қамтиды. Төтенше жағдайлар департаментінің мәліметінше, қазірдің өзінде осы бағыттағы жұмыстар белсенді түрде жүргізілуде.
Жоспарды жүзеге асырудың негізгі аспектілерінің бірі азаматтардың судағы қауіпсіздік ережелері туралы білімін нығайтуға бағытталған ақпараттық-профилактикалық іс-шаралар болып табылады. Мәселен, жыл басынан бері 1289 рейдтік және патрульдік іс-шаралар өткізіліп, соның барысында 7,4 мыңнан астам үнпарақтар мен жаднамалар таратылды, мектептерде интерактивті және ашық сабақтар, көпқабатты үйлердің аулаларында тұрғындармен кездесулер ұйымдастырылды.
Суға түсу маусымына дайындықтың маңызды бөлігі су қоймаларының түбін тексеру болды. Облыстың 10 ауданында жоспарланған іс-шаралар аясында сүңгуірлер қазірдің өзінде 46 аумақты тексеріп, оның 24-іне суға түсуге рұқсат берілген. Жергілікті әкімдіктер бұл аумақтарға кезекші құтқарушыларды қояды.
Бұл күндері жазғы маусымда жағажайларда жұмыс істейтін құтқарушыларды да оқыту қызу жүріп жатыр. Су айдындарындағы қауіпсіздікті қамтамасыз етуге барлығы 367 адамды тарту жоспарланып отыр. Сондай-ақ облыста балаларды жүзуге үйрету мақсатында 85 рамалық модульдік бассейн жұмыс жасайды.
Айта кетейік, облыста суға түсуге тыйым салынған 206 аймақ бар. Өткен жылы бұл аумақтарда 320-дан астам тыйым салу белгілері орнатылған болатын. Қазіргі уақытта оларды жаңарту жұмыстары жүргізіліп жатыр. Былтыр 13 қайғылы өлімнің сегізі тыйым салынған аумақтарда орын алғанын есте ұстаған жөн. Сол үшін қарапайым қауіпсіздік ережелерін сақтау керек.
