АЭС референдумына қатысу – ел болашағына жауапты қадам

АЭС мәселесі соңғы уақытта елімізде ең көп талқыланатын тақырыптардың біріне айналды. Энергетикалық қауіпсіздік мәселесі әрбір мемлекет үшін стратегиялық маңызға ие, ал Қазақстан үшін бұл өзекті мәселелердің бірі. Атом электр станциясын (АЭС) салу – осы бағыттағы ірі қадамдардың бірі, әрі халықтың белсенді қатысуы мен пікірі маңызды. Сондықтан АЭС құрылысы бойынша референдум өткізу – орынды шешім. Бұл ел болашағына тікелей әсер ететін маңызды қадам болмақ.

Атом электр станциясын салудың көптеген артықшылықтары бар. Біріншіден, Қазақстанда энергетикалық қажеттіліктерді тұрақты түрде қанағаттандыру маңызды. Елдің өнеркәсібі дамып, халық саны артып келе жатқан кезде, энергия тұтыну көлемі де өседі. Қазіргі уақытта біз электр энергиясының едәуір бөлігін дәстүрлі отын көздерінен аламыз, бұл экологияға үлкен салмақ түсіріп, ауаға шығарылатын көмірқышқыл газының мөлшерін арттырады. АЭС болса, экологиялық тұрғыдан анағұрлым таза энергия көзі болып табылады, өйткені ол атмосфераға зиянды газдар шығармайды және парниктік эффект тудырмайды. Екіншіден, атом энергетикасы – ұзақмерзімді әрі тұрақты энергия көзі. Әдеттегі отын көздері, мысалы, көмір мен мұнай, сарқылатын ресурсқа жатады, ал атом энергиясы салыстырмалы түрде ұзақ уақыт бойы қолданылуға жарамды. Үшіншіден, атом энергетикасы Қазақстанның экономикалық дамуына жаңа серпін береді. АЭС құрылысы – тек энергия өндіру ғана емес, сонымен қатар жаңа технологиялар, ғылыми зерттеулер мен инновацияларға жол ашатын мүмкіндік.

Дегенмен, АЭС құрылысы туралы шешім қабылдау – тек артықшылықтарды қарастырумен шектелмейтінін ескеруіміз керек. Бұл шешімнің маңызы зор болғандықтан, тәуекелдер мен қиындықтарды да сараптап, халықтың пікірімен санасу керек. Атом энергетикасы қауіпсіздігіне қатысты мәселелер өте маңызды. Сондықтан АЭС салу барысында ең жоғары қауіпсіздік стандарттарын сақтап, халықтың денсаулығы мен қоршаған ортаны қорғау үшін барлық шаралар қабылдануы тиіс.

Референдум арқылы әрбір қазақстандық АЭС бойынша өз ойын білдіріп, елдің болашағына қатысты шешім қабылдауға тікелей қатысуға мүмкіндік алады. Бұл демократиялық қоғамның негізгі қағидаларының бірі. Әрбір азаматтың дауысы маңызды және әрбір пікір құнды. Қоғамның белсенділігі еліміздің саяси және экономикалық дамуының іргетасын қалауға септігін тигізеді.

Референдумға белсенді қатысып, ел болашағы үшін дұрыс таңдау жасау – бүгінгі және ертеңгі ұрпақ алдындағы жауапкершілігіміз.

Ауданның белсенді жасы Амандыкова Е.К